बंदी येणार असूनही चिनी मोबाईलची विक्री जोरातराष्ट्रीय सुरक्षा ः लोकांमध्ये जागृती नसल्याचे स्पष्ट

रूपाली पेठकर ः सकाळ वृत्तसेवा
मुंबई, ता. 6 ः इंटरनॅशनल मोबाईल इक्विपमेंट आयडेन्टीटी (आयएमईआय) क्रमांक नसलेल्या चिनी मोबाईलवर भारतात येत्या 15 एप्रिलपासून बंदी घालण्यात येत असतानाही या मोबाईल फोनची विक्री बाजारात जोरात सुरू आहे. चिनी मोबाईलवर बंदी घालण्याचा निर्णय राष्ट्रीय सुरक्षेसाठी घेण्यात येत असला, तरी लोकांमध्ये मात्र त्याबाबत जागृती नसल्याचेच यावरून स्पष्ट होते.आकर्षक मॉडेल, दोन सीम कार्ड, डिजिटल आवाज अशी वैशिष्ट्ये असलेल्या आणि खिशाला परवडणाऱ्या किमती असलेल्या चिनी मोबाईलने गेल्या वर्षभरात ग्राहकांवर चांगलेच गारूड केले आहे. सहासात महिने वापरून फेकून देऊ अशा मानसिकतेतून ग्राहकांनीदेखील या मोबाईलच्या सुमार दर्जाकडे काणाडोळा केला; मात्र देशभरात झालेल्या घातपाती कारवायांत चिनी मोबाईलचा वापर झाल्याचे उघडकीस आले आहे. आयएमईआय क्रमांकामुळे जगभरातून कुठूनही मोबाईलवरून केलेला फोन ट्रॅक करणे सोपे ठरते; मात्र देशात गेल्या वर्षभरात विकले गेलेल्या लाखो चिनी मोबाईलमध्ये आयएमईआय क्रमांकच नसल्याचे उघड झाले आहे. या मोबाईलवरून झालेले फोन ट्रॅप करून त्यांचा मागोवा घेणेही तपासयंत्रणांना कठीण ठरू लागले, त्यामुळे त्यांच्या वापरावर तसेच विक्रीवर बंदी आणावी, असे सीबीआयने केंद्र सरकारला सुचविले होते.आयएमईआय क्रमांक नसलेल्या मोबाईल्सना सेवा पुरविणे 15 एप्रिलपासून बंद करावे, असे दूरसंचार विभागाने मोबाईल सर्व्हिस पुरविणाऱ्या कंपन्यांना सांगितले आहे. तसेच सध्या आयईएमआय क्रमांक असलेले चिनी मोबाईलही बनावट असल्याचे आढळून येत आहे, त्यामुळे ग्राहकांनी विक्रेत्यांच्या भूलथापांना बळी न पडता जागरूक होण्याची गरज व्यक्त करण्यात येत आहे.चिनी मोबाईलची प्रमुख बाजारपेठ असलेल्या मुंबईतील दुकानांमध्ये फेरफटका मारला असता एका मोबाईल विक्रेत्याने एका मोबाईलला चक्क दोन आयएमईआय क्रमांक असल्याचे दाखवले. यावरून हे विक्रेते ग्राहकांची चक्क फसवणूक करीत असल्याचे स्पष्ट होते. सरकारने चिनी मोबाईलवर बंदी घातली असली, तरी कालच शहरात कोट्यवधी रुपयांचा माल उतरला असल्याची माहिती या मोबाईल विक्रेत्याने "सकाळ'शी बोलताना दिली.

बीएसएनएलची नजरभारताबाहेरील कंपन्यांवर

सकाळ वृत्तसेवा
मुंबई ः सध्याच्या स्पर्धात्मक युगात आता भारत संचार निगम लिमिटेडनेदेखील जागतिक बाजारपेठेत शिरकाव करण्याचे ठरविले आहे. यापूर्वी महानगर टेलिफोन निगम लिमिटेडने नेपाळबरोबर करार केला आहे. सध्याच्या स्पर्धेत भविष्यात जी कंपनी भविष्यातील उत्कर्षपथावर असेल अशाच कंपनीबरोबर बीएसएनएल भागीदारी करण्यास उत्सुक असेल. यासाठी कंपनीच्या त्या उद्योगाच्या महसूल आणि व्याप्तीचा तसेच रचनात्मक नेटवर्क या निकषांवर कंपनी पुढील पाऊल टाकेल.सद्यपरिस्थित बीएसएनएल टीसीआयएलसह टुनिसिया या देशातील कंपनीबरोबर भागीदारी करण्यास उत्सुक असल्याची माहिती कंपनीचे मुख्य कार्यकारी संचालक कुलदीप गोयल यांनी दिल्ली येथे वृत्तसंस्थेला दिली. एमटीएनएलने नेपाळ येथील कंपनीबरोबर भागीदारी केल्यानंतर सौदी अरेबिया आणि केनियासारख्या पूर्व आशियातील कंपन्यांबरोबरही अयशस्वी प्रयत्न केला होता. मात्र तो फसल्यामुळे आता बीएसएनएलने या दोन देशातील कंपन्यांवरही नजर ठेवून आहे.

निसर्गसौंदर्य न्याहळण्याची संधी लडाखला "बीएनएचएस'चा नेचर ट्रेल

सकाळ वृत्तसेवा
मुंबई : मे-जून महिन्यात बर्फ वितळू लागला की हिमालयाच्या उत्तुंग पहाडांचे सौंदर्य पाहण्यासाठी अनेक पर्यटकांचा मोर्चा हिमाचल प्रदेश, जिम कॉर्बेट आणि लडाखच्या वाळवंटाकडे वळतो. अशाच निसर्ग सौंदर्य आणि निसर्गप्रेमी पर्यटकांसाठी बॉम्बे नॅचरल हिस्टरी सोसायटी(बीएनएचएस) या संस्थेने नेचर ट्रेलचे आयोजन केले आहे. यामध्ये खारफुटीसाठी प्रसिद्ध असलेल्या सुंदरबन, विविध प्रकारचे जंगल आणि वातावरणात आढळणाऱ्या जिम कॉर्बेट आणि लडाखचे गार वाळवंट पाहता येणार आहे. सुंदरबनच्या ट्रेलला उत्कृष्ट प्रतिसाद मिळाला असून जिम कॉर्बेट आणि लडाखच्या ट्रेलची तयारी सुरू झाली आहे. जिम कॉर्बेट हे हिमालय रेंजच्या पायथ्याशी असल्याने तिथे उतारावरचे, सखल भागातले आणि तरईतले असे तीन प्रकारचे जंगल पाहायला मिळते. तेथील वनस्पती, प्राणी आणि पक्षी यांच्या जाती आणि त्यातील विविधता अभ्यासायला मिळते. लडाखच्या वाळवंटात बर्फातला बिबट्या, पुरंग, रानटी गाढव आणि तिबेटीयन कोल्हे असे प्राणी येथे पाहायला मिळतात. तर सिंधूच्या खोऱ्यात अतिशय दुर्मिळ वन्यजीवन असतात.बीनएनचएसच्या या ट्रेलमध्ये या निसर्गसौंदर्याची ओळख करून देण्यात येणार आहे. जिम कॉर्बेटला जाण्यासाठी बीएनएचएसने 22 ते 26 मे आणि 28 मे ते 1 जून अशा दोन तुकड्या केल्या आहेत. त्यासाठी आठ हजार रुपये इतके शुल्क आकारण्यात येणार आहे. तर लडाखसाठी 1 ऑगस्ट ते 8 ऑगस्टपर्यंतची एक बॅच असून त्यासाठी 26 हजार शुल्क आकारण्यात येणार आहे. अधिक माहितीसाठी संपर्क ः अतुल साठे 9820454262 यांच्याशी संपर्क साधावा.