गाडीतही टच-स्क्रीन एंटरटेनमेंट दूरवरचा प्रवास होणार मनोरंजक

First time in d world
as he said...

विमानात असणारी टच-स्क्रीन टीव्ही सेवा आता यापुढे चारचाकी गाडीतही उपलब्ध होणार आहे. तैवान येथील मायक्रो स्टार इंटरनॅशनल या कंपनीने ही प्रणाली तयार केली आहे. भारतात ही सेवा देण्यासाठी "फनटारो' या जगातील आघाडीच्या विपणन संस्थेने पुण्यातील डीएसके डिजिटलबरोबर करार केला आहे. आज "डीएसके फनटारो' या कंपनीने याची अधिकृत घोषणा केली. अशी सेवा देणारी ही जगातील एकमेव कंपनी असल्याचा दावा कंपनीच्या अधिकाऱ्यांनी केला आहे. या सेवेमुळे आता दूरचा प्रवास करणाऱ्यांना ड्रायव्हरच्या आवडीचा चित्रपट पाहत वेळ घालवावा लागणार नाही. प्रत्येकाला वेगळ्या स्क्रीनवर आपल्या आवडीचा चित्रपट पाहता येईल. त्यामुळे प्रवासही मनोरंजक होणार आहे. गाडीतील आसनांनुसार दोन, चार, सहा किंवा अगदी 60 आसनी बसमध्येदेखील प्रत्येकाच्या समोर "टच-स्क्रीन डिजिटल टीव्ही' सेवा उपलब्ध होणार आहे. तैवान येथील मायक्रोस्टार इंटरनॅशनल कंपनीने ही प्रणाली विकसित केली आहे. पुण्यातील डीएसके डिजिटल ही कंपनी भारतात वितरण आणि इन्स्टॉलेशनचे काम करणार आहे. त्यामुळे प्रत्येक प्रवाशाला आपल्या आवडीनुसार कार्यक्रम पाहता येतील. शिवाय स्कीनवर गेम्सही खेळता येतील. विशेष म्हणजे त्याचा इतरांना त्रासही होणार नाही. याशिवाय या तंत्रज्ञानात युरोपियन देशांसारखा नकाशा दाखविण्यासाठी "जीपीएस' सेवेचा वापर करून नॅव्हीएशनची सुविधा उपलब्ध असेल; तर डीश टीव्हीच्या छोट्या अँटेनाच्या साह्याने लाईव्ह कव्हरेज देण्याचीही यामध्ये सोय करण्यात आली असल्याचे कंपनीचे व्यवस्थापकीय संचालक मिलिंद क्षीरसागर यांनी "सकाळ'ला सांगितले. सध्या कंपनीने टोयोटो, मर्सिडीस यांसारख्या 80 गाड्यांमध्ये ही सेवा दिली आहे. वर्षभरात 50 हजार युनिट गाड्यांमध्ये बसविण्याचे उद्दिष्ट कंपनीने ठेवले आहे. यासाठी तंत्रज्ञानात आठ जीबीची रि-राईटेबल हार्ड-डिस्क वापरण्यात येणार आहे. सात इंचाच्या एलसीडी टच-स्क्रीनवर चित्रपट पाहता येईल. तसेच इन्स्टॉलेशन झाल्यावर त्याची वर्षभराची वॉरंटीदेखील दिली जाणार आहे. भारतासह जगभरातील 45 देशांमध्ये असे तंत्रज्ञान पहिल्यांदाच वापरले जात असल्याचा दावा यावेळी क्षीरसागर यांनी केला. याबाबत अधिक माहितीसाठी enquiry@dskdigital.com या संकेतस्थळावर लॉगऑन करता येईल.